ابني عنيد وما بيسمعش كلامي خالص . أعمل أيه ؟! ----------------------------------------------------------------
كتير من الأمهات بتشتكي من مشكلة العناد عند ابنها أو بنتها ومش عارفة تعمل أيه!
ده موضوع النهاردة .. وإن شاء الله تستفيد كل أم من مقال اليوم في تعديل مسار ابنها ، مع التأكيد على وجود فروق فردية من طفل لطفل تاني.
علما بأن ما اذكره هنا إطار عام لا ينطبق بالضرورة على كل الأطفال ؛ لأن لكل طفل خصائص جسمية ونفسية وعقلية وانفعالية ، وما يناسبه قد لا يناسب طفل آخر بالضرورة ..
ست الكل خلي بالك .. العناد بيظهر بدري أوي في حياة ابنك يمكن من عمر سنتين بس تخيلي! يبدأ يقول كلمة "لا" والعناد يزيد شوية بشوية لغاية عمر ٧ سنين .. والطبيعي أن العناد يبدأ يقل تدريجيا مع دخول ابنك المدرسة.
ست الكل خلي بالك .. لو تعاملتي غلط مع عناد ابنك هنا الولد هيتطبع بالعناد وهيكمل كده ويبقى اضطراب سلوكي محتاج تدخل من دكتور متخصص!
الأول يعني أيه عناد؟
---------------------------
ببساطة العناد هو التمرد على السلطة ، وكسر للقواعد اللي المفروض ابنك يلتزم بيها جوه البيت والمدرسة وفي أي مكان تاني ..
والعناد ببساطة أكتر وجود إرادتين عكس بعض .. الأولى : إرادة ابنك والتانية : إرادة حضرتك!
خلي بالك يا ست الكل .. الدراسات العلمية قالت أن ابنك بيتعلم يقول "لا" الأول قبل ما يقول "حاضر"! وده طبيعي.
هنا السؤال ابنك كان مطيع خالص وبيسمع كلام ماما وبابا وجدو وتيته والجيران كمان .. فجأة اتقلب للعناد وكأنه بقى طفل تاني؟!
طيب تعالي نشوف مع بعض حاجة تانية:
أسباب العناد عند الأطفال:
---------------------------------
العناد له أسباب كتير جدا على فكرة منها:
١. ابن حضرتك بيخلط بين الواقع والخيال.
٢. حضرتك مدلعة ابنك بزيادة شوية.
٣. حضرتك مهملة ابنك بزيادة شوية.
٤. ابنك حاسس أنه أقل من باقي الأولاد.
٥. ابنك بيحاول يلفت نظرك لأنك مش معبراه.
٦. ابنك بيغار من أخته أو أخوه لأنك مهملاه.
٧. ابنك بيقلد حضرتك لأنك حضرتك عنيده.
وأسباب تانية كتير ما عنديش وقت أكتبها وكفاية دووول!
ننتقل بقى لأنواع العناد عند الطفل ولو سمحتي لازم تحددي ابنك أي نوع فيهم:
أنواع العناد عند الأطفال:
------------------------------
١. عناد فسيولوجي : وده سببه مشكلة في الدماغ. وده قليل شوية عن غيره ومرتبط بالذكاء وحاجات تانية.
٢. عناد سلوكي : وده سببه حضرتك طبعا ؛ لأنك اتعاملتي غلط مع ابنك العنيد سنوات طويلة فبقى عنيد ومشاكس ويمكن عدواني.
٣. عناد لطيف كله تحدي وإرادة وتصميم : وده طبيعي خالص وحلو ولازم تشجعيه عند ابنك.
٤. عناد عدم فهم : وده بسبب عدم فهم ابنك للموقف اللي بيمر فيه حاليا وعلشان كده بيعاند لأنه ماىيعرفش.
٥. عناد مع النفس : وده سببه أن ابنك غضبان ومحبط فبيعاندك زي مثلا يرفض ياكل رغم أنه هيموت من الجوع لأنه زعلان.
مراحل العناد عند الأطفال:
---------------------------------
ست الكل ركزي معايا خالص هنا ، ولازم تعرفي ابنك في أي مرحلة منهم بالظبط:
١. ابنك بيعاندك آه لكن بيعمل اللي حضرتك عايزاه منه بس زعلان وحزين وضارب بوز.
٢. ابنك بيعاندك آه لكن بيعمل اللي حضرتك عايزاه بس تحسي أنه عايز يشتمك أو يضربك.
٣. ابنك بيعاندك خالص وبيعمل عكس اللي حضرتك عايزاه .. يعني يمين تبقى شمال وشمال تبقى يمين ، ويصرخ ويلطم كمان.
علاج العناد عند الأطفال:
-------------------------------
أعمل أيه مع ابني العنيد بالمختصر المفيد؟
لازم أوضح أن كلامي مجرد إرشادات عامة لا تنطبق على طفل معين . والهدف منها مساعدة ماما في البيت تؤدي دورها كأم ، وإلا لازم تعرضي ابنك على دكتور تربوي وسلوكي فورا.
- علشان خاطري .. ما تصرخيش في وش ابنك خالص.
- علشان خاطري .. ما تطلبيش من ابنك أمرين مع بعض
خالص.
- علشان خاطري .. ما تسخريش من ابنك خالص.
- علشان خاطري .. ما تقارنيش بين ابنك وأي طفل تاني
خالص.
- علشان خاطري .. ما تلوميش وما تأنبيش ابنك عمال على
بطال.
- علشان خاطري .. ما تهدديش ابنك بأي حاجة خالص.
- من فضلك خليكي قدوة قدام ابنك طول الوقت.
- من فضلك قولي لابنك المطلوب منه وبس.
- من فضلك كافئ ابنك لما يسمع كلامك.
- من فضلك قدمي ابنك للناس على أنه بيسمع الكلام.
- من فضلك اثني علي ابنك قدام الناس كلها.
- من فضلك افصلي بين ابنك وبين سلوكه الوحش.
تعليقات
إرسال تعليق