مفيش

#مفيش حد فينا كامل

- مرة سمعت حد بيقول " احنا كلنا جوانا جزء طماع بس الذكي هو اللي يقدر يتغلب علي الجزء دا "

- اعرف اتنين كانوا مرتبطين بقالهم كتير و مرة واحدة البنت قررت تنهي العلاقة دي بدون اي سبب و كان ردها " أنا أستاهل حد أحسن " برغم ان الولد دا كان محترم جدا و بيحبها و مقصرش معاها ف حاجة ..

- دايما ف المسلسلات لما واحد يسيب مراته مع انها كويسة معاه و يروح لواحدة غيرها يقولوا " دا ميملاش عينه الا التراب "

تسمعوا عن نظرية اسمها نظرية ال 80 % و ال 20% ؟!

النظرية دي بتقول إن أي علاقة ناجحة أو سوية .. الطرف الواحد فيها مش بيقدر يحصل علي اكتر من 80 % من الطرف التاني ..

ال80% دول بيبقوا حب و احترام و تشجيع و مشاركة و حاجات تانية كتير ..

غالبآ حياتكم بتبقي ماشية كويس لحد ما يظهر الشخص التالت اللي معاه ال 20% اللي ناقصين .. 

ف يبدأ يبهرك لانه بيملك حاجات ( ال 20% ) مش بيملكها الطرف التاني ( اللي بيملك ال 80% ) ..

و تلاقي نفسك من غير ما تحس بدأت تروح ورا الشخص اللي معاه ال 20% و تنجذب لي .. و تنسي الطرف التاني اللي كان معاه ال 80% ..

بس بعد ما يعدي فترة .. بتعرف انك كنت غلطان و ان ال 20% دول مش بيشبعوا احتياجاتك الكتير .. بس للأسف بيكون وقتها ال 80% راحوا و صعب و ترجعهم تاني ..

احنا كلنا جوانا جزء طماع ... و جزء تاني راضي بأي حاجة 

الاتنين بيكملوا بعض و بيعملوا توازن يساعدنا اننا نختار صح ..

بس أول ما التوازن دا بيختفي .. بيتحكم فينا جزء واحد بس ..

ف نبدأ نطمع و نشوف نفسنا نستاهل أحسن و ننجذب لل 20% اللي ناقصانا ..

او نرضي بحاجات أقل من ال 80% و نيجي علي نفسنا بنسبة كبيرة ف نكمل حياتنا مع حد ميستاهلناش ..

الحب او الارتباط عامًة عمره ما كان بيتقاس ب مين الأحسن .. لانك دايما هتلاقي احسن من الطرف اللي انت مرتبط بيه .. و ممكن جدا تقابل شخص ناجح اكتر او مثقف اكتر او عاقل اكتر ...

بس هو بيتقاس بنسبة ال 80% الشخص اللي قدامك دا بيعمل اللي يقدر عليه عشان يسعدك ؟! ... بني آدم سوي عنده مميزات و عيوب بس مميزاته اكتر من عيوبه ؟ 

بيشجعك و بيحترم قراراتك ؟

اسئلة كتير بتبين الشخص دا سوي و مناسب ولا لأ ..

اول ما تلاقي ال 80% .. حافظ عليهم و متسيبهمش و تروح لل 20% اللي ناقصينك ..

عشان مفيش حد فينا كامل