كتاب نظرية الفستق

نظرية الفستق

**********

من الكتب اللي قرأتها كتاب "نظرية الفستق" للكاتب فهد عامر الأحمدي...الكتاب من كتب تطوير الذات واللي الكاتب بيشارك فيه نظرياته وأفكاره علشان تفهم نفسك الأول وبعد كده تطور من نفسك وتحقق أهدافك...اتكلم عن أكتر من موضوع زي:

========

-أهمية أنك تحط خطة لحياتك وتكون خطة مرنة وفيها أهداف واضحة...بكده هتوظف طاقتك في الاتجاه المناسب.

-مهم أنك تعرف نفسك وقدراتك فبالتالي هتحط أهداف مناسبة لك...لو فشلت في تحقيق أهدافك متلومش غير نفسك..افتكر أحلام طفولتك وفكر في تحقيق الأحلام دي.

-لما يبقى هدفك وحلمك كبير بالتالي لو لم يتم تحقيقه هيبقى اللي حققته من الانجازات كتير.

-احسن الظن بنفسك وبالناس...اللي بتظن فيه هو اللي بيتحقق..لو بتظن أن شخص هيعاملك بشكل سىء بالفعل هيعاملك كده..لو برضه قللت من قيمة نفسك الناس هتعاملك زي مانت شايف نفسك.

-حافظ على طاقتك وابعد عن الجدال السلبي..لو اضطرت تجادل مع شخص سلبي فعلشان تحافظ على طاقتك استرخي واسكت وابتسم واستعيذ بالله من الشيطان.

-ناس كتير بتعتقد أنها أذكي مما تعتقد بالرغم أن معظم أفكارهم موروثات ومش بيحبوا يتعرفوا أو يقرأو عن الرأي الآخر.

-علشان تنمي ذكائك فكر في عكس معتقداتك وابحث فيها وتقبل الرأي الآخر ومتتعصبش لرأيك.

-تحقيق النجاح بيتحقق عن طريق عادات يومية صغيرة.

-علشان حظك يبقى كويس اهتم بأنك تخلق فرص لنفسك وخليك مستعد عن طريق تطوير معلوماتك باستمرار.

-نظرية الفستق هي نظرية اخترعها الكاتب أثناء نصيحته لابنه وهو بيقود السيارة...قاله تخيل أنك كنت بتسوق العربية علشان رايح تشتري فستق وبعدين حد كان بيتحداك في السواقة فانت كنت بتعند معه فعملت حادثة تسببت في موت الشخص التاني واللي كان عنده أولاده أصروا أنك تدخل السجن...فالنتيجة أن واحد مات وواحد دخل السجن بسبب شوية فستق...الخلاصة ممكن تصرف بسيط تعمله في لحظة غضب يغير حياتك بالكامل..علشان كده مهم تفكر كويس قبل ما تعمل أي تصرف.

-مهم تخلي نصائحك لأولادك مكتوبة..هيلتزموا بها أكتر من الشفوى.

-مهم برضه تخلي أهدافك مكتوبة..ده هيخليك تحققها بشكل أسرع.

-مش شرط الأغلبية يبقى رأيها صح....مش شرط برضه الآراء القديمة والموروثات تبقى صح...فكر وحلل كل حاجة.

-اغسل مخك بنفسك..عن طريق تقول لنفسك توكيدات إيجابية باستمرار.

-اتكلم برضه عن نظريات معروفة زي 20/80 والقبعات ال6 في التفكير وأهمية أنك تعمل قائمة مهام يومية لنفسك...وتفكر بالورقة والقلم مستخدم الخرائط الذهنية.

-السعادة والتعاسة مصدرها داخلي مش بتبقى بسبب ماديات...اكتب قائمة بالحجات الصغيرة اللي بتسعدك وخليك ممتن لها.

-خلي من أهدافك أنك تشتغل في حاجة بتحبها ومتبقاش موظف طول عمرك.

-قول لأ لو حسيت أن اللي قدامك بيستغلك وبيلقى مهامه عليك سواء في حياتك العملية أو الخاصة.